كشفت الفنانة المصرية صابرين، عن أكتر قرار خاطىء اتخذته في حياتها.
وقالت “صابرين” خلال حلولها ضيفة على قناة CBC بقولها: “أكتر حاجة غلط خدتها في حياتي هي إني بعدت عن الغناء وركزت في التمثيل بس، رغم إن ده كان ليه أسباب منها إن في حاجات كتير اتعرضت عليا مهمة جداً زي مسلسل أبو العلا البشري والمخرج محمد فاضل خدني في أكتر من حاجة فما عرفتش مع التصوير اركز في الغنا كمان”.
وعن طريقة أداء الشخصيات التي تلعبها” صابرين”في مشوارها الفني، فقالت: “بقول لنفسى جملة كل ما أنزل أروح أصور دور جديد، وهي اوعي تبقى محترفة خليكي هاوية، علشان أفضل محتفظة بروحي بتاعة زمان، وأبقى نفسى أعمل الدور بتميز زي ما كنت في البدايات، لأني لو بقيت محترفة وواثقة بزيادة في نفسى مش ها أنفذ الدور مظبوط”.
أما عن دورها في مسلسل” مسار إجباري” ، فذكر صابرين: “دور الأم في العمل كان يبدو بسيط، ولكن ترك علامة وبصمة مميزة عند الجمهور، فأنا حينما أذهب للتصوير حتى الآن لا أزال أحتفظ بشغفي وكأنى هاوية في بدايتي”.
كما كشفت “صابرين”، أنها تعلمت من الفنانة الكبيرة فاتن حمامة أمورا عديدة، أبرزها احترام المواعيد فى كواليس مسلسل ضمير أبلة حكمت، وقالت: “كنا بننكسف جداً إنها كانت بتيجي قبلنا، وكنت براقبها بصورة كبيرة وهي بتشتغل في كل التفاصيل الصغيرة علشان أتعلم منها”.
وذكرت أيضا:” كانت بتبص لناس حواليها معينين تطمن منهم إن أداءها مظبوط من كتر ما كانت بتثق فيها زي الفنانة سميرة عبد العزيز، والفنانة إنعام سالوسة”.
واختتمت: “كانت فاتن حمامة بتهضم الشخصية مش بتحفظها، ودي كانت حاجة مميزة جداً ليها”.
