ردت الممثلة الشابة ملك أحمد زاهر على بعض الأخبار التي انتشرت عن ارتباطها بعد ظهورها في جلسة تصوير ترتدي فستانا أبيض.
وظهرت ملك أحمد زاهر في فيديو عبر خاصية القصص القصيرة في حسابها على Instagram قالت فيه: “معلش يا جماعة بس أنا غير قادرة إني أسكت، نزلت جلسة تصوير من يومين بفستان أبيض والمقصود بيه إنه ملائكي والحمد لله في 80 % من الجمهور فهموا، في 20 % بيقولوا مبروك دا كتب الكتاب ولا الخطوبة يكونش قراية الفاتحة ألف مبروك”.
وتابعت ملك أحمد زاهر: “يعني هل لو فكرنا 5 ثواني هنلاقي أن مفيش عريس في ولا صورة هل أنا للدرجة دي موصلالكم إني بكره الصنف الآخر لدرجة إني مش هحطه معايا في جلسة تصوير جوازنا، أكيد لا لأ يا جماعة هتموتوا وتجوزوي هيجرالكم حاجة”.
وأطلت ملك أحمد زاهر في الصور بفستان أبيض رقيق، مع تاج زين شعرها وبدت كأنها عروس.
وتركت ملك أحمد زاهر شعرها ينسدل ناعما على كتفها واهتم بإطلالتها مكياج سلمى شريف، تصفيف شعر ألفريد ومينا، أما الفستان من Taya.
على جانب آخر، سبق وكشفت ملك أحمد زاهر عن مواصفات فتى أحلامها وقالت: “لازم يكون حنين أوي ورومانسي، عشان أنا طيبة ورومانسية، ويكون راجل ومسئول ومتفاهم عارف شغلي وبيشجعني فيه وأنا أشجعه في شغله”.
وأوضحت ملك أحمد زاهر أنها لا تفكر في الارتباط الآن فالأهم لديها هو عملها قائلة: “أنا مركزة في شغلي دلوقتي والحاجات دي بتكون قسمة ونصيب ومستنية يجي الشخص المناسب عشان أنا طيبة وأول ما ألاقي الشخص الكويس اللي يعاملني زي بابي هرتبط بيه”.
يذكر أن ملك أحمد زاهر شاركت في رمضان 2024 بمسلسل “محارب”.
ومسلسل “محارب” من بطولة حسن الرداد وأحمد زاهر وناهد السباعي وماجد المصري ونرمين الفقي وتامر عبد المنعم ومحمود ياسين جونيور وملك أحمد زاهر ومنة فضالي ونور محمود ومحمود الليثي ومحمود البزاوي وسلوى عثمان وعفاف شعيب، تأليف محمد سيد بشير وإخراج شيرين عادل وإنتاج أحمد السبكي.
